Pages

Showing posts with label Annual Day. Show all posts
Showing posts with label Annual Day. Show all posts

Sunday, April 4, 2010

વાર્ષિકોત્સવ વિષે વધૂ- પ્રતિભાવ

મનન શાહે વાર્ષિકોત્સવ વિષેના પોતાના પ્રતિભાવો મોડા મોડા પણ મોકલ્યા તે બદલ તેમનો આભાર. આ બ્લોગ ઉપર તમો તમારા અભિપ્રાયો મોકલતા રહો તો આપણા સમાજનો સભ્ય શું માને છે અને શું માગે છે તે બહાર આવે. સમાજને બહુમતિની માંગ પ્રમાણે આપણે વાળી શકીયે. મનનભાઇ એ જે સંદેશો મોકલાવેલ છે તે આ પ્રમાણે છે.

I Agree to you time management was very poor. lots of time was wasted by guest from Jamnagar & guess how was he allowed on stage to speak so much. Also no co-ordination of Hareshbhai with Kishorebhai who i feel was the most responsible. Also only few committee members were working sincerely & rest were having fun in pool & some on stage were reluctant to take charge & help those working hard down the stage in managing price distribution.

I PERSONALLY FEEL SILENT RESORT WAS MUCH BETTER MANAGED THEN GREAT ESCAPE.
Jai Jinendra

Manan shah

તેનો તરજુમો થોડો ઘણો આવો થાય :

હું આપની સાથે સહમત છું કે સમય વ્યવસ્થાને નામે મીંડુ હતુ. જામનગરથી આવેલ મહેમાને ઘણો બધો સમય લઇ લીધો અને વિચારો કે તેને આટલો બધો સમય શા માટે આપવામાં આવ્યો ?. હરેશભાઇ અને કિશોરભાઇ, કે જેઓ બન્ને સમાજના જવાબદાર સભ્યો છે, વચ્ચે એક સુત્રતાનો અભાવ હતો. બહુ ઓછા કમિટિ મેમ્બરો સાચી લગનથી કામ કરતા દેખાતા હતા બાકીના તરણ હોજોમાં મોઝ કરી રહ્યા હતા. સ્ટેજ ઉપરના કમિટી સભ્યો બાગડોર પોતાના હાથમાં લેતા અને નીચે ઇનામ વિતરણની ગોઠવણ કરતા અન્ય કાર્યકરોને મદદ કરતા અચકાતા હતા.

હું અંગત રીતે માનુ છું કે સાયલન્ટ રિસોર્ટનો પ્રોગ્રામ ગ્રેટ એસ્કેપ કરતા વધારે સારો હતો.

જય જિનેન્દ્ર

મનન શાહ

Tuesday, February 23, 2010

વાર્ષિકોત્સવ વિષે વધૂ

આજે ટીકાઓનો દિવસ છે. ટીકાઓ ખંડનાત્મક નથી પરંતુ રચનાત્મક છે. કમિટિના સભ્યો ભવિષ્યમાં વધૂ સારી રીતે તેમની કામગીરી પાર પાડે અને વધૂ યશદાયી નિવડે તે ભાવના સાથે અત્રે લખવામાં આવેલ છે.

૧) સુવેનિયરના લક્કી ડ્રોમા આટલી મોટી રકમના ઇનામો રાખેલા હોવા છતા તેની યોગ્ય જાહેરાત થઇ નહી. તેને વેચવા માટે કોઇ ખાસ પ્રયત્ન પણ ન થયા. એટલું જ નહી પરંતુ તેનુ વેચાણ કંયાં થતુ તેની ખબર સુધ્ધા ઘણાને ન હતી. આવડા મોટા ઇનામ રાખ્યા હોય ત્યારે તેનો જોર શોરથી પ્રચાર થવો જોઇતો હતો.

૨) કાર્યકરો અને કમિટિ મેમ્બરોને જે Badge (બિલ્લા) આપવાના હતા તે સર્વેને પહોચ્યા નહોતા.તે કામ કોઇ ચોક્કસ વ્યક્તિને સોપાવું જોઇતુ હતુ.

૩) કાર્યક્રમ શરૂ થતા પહેલા આપણા માટે ખાસ ઊભા કરેલા મંડપમાં થોડી ગરમાગરમી મંડળના કાર્યકર અને કોઇ જ્ઞાતિજન વચ્ચે થઇ. વાત ગાળાગાળી સુધી પહોચી. જ્ઞાતિજન અને કાર્યકર બન્ને પોતાની ફરજ નિભાવવામાં ઉણા ઉતર્યા. તેમણે પ્રસંગની ગરિમા જાળવીને મામલો બિચકાવવાની જરૂરત નહોતી.

૪) આ કમિટિ નવી છે અને અનુભવમાં ઓછી છે તેવું તેમણે પોતે કાંઇ પણ કિધા વગર સાબિત કરી આપ્યું. હાઉસીની ટિકીટ ૧૦-૧૦ રૂપિયામાં વેંચી તો ખરી પણ હાઉસી રમાડી જ ન શક્યા અને બધાને પૈસા પરત કરવા પડ્યા.

૫) વેબ-સાઇટનો જોર શોરથી પ્રચાર તો થયો પરંતુ ઉદઘાટન બાદ વેબ સાઇટનું ડેમોનસ્ટ્રેશન આપવા માટેનો કાર્યક્રમ જ રદ્દ કરવો પડ્યો. તેઓએ ડેમોનસ્ટ્રેશન દરમ્યાન ચર્ચવાની વિગતોનુ ફરફરીયુ જ્ઞાતિજનોમા ફેરવ્યુ પરંતુ તેનો ઉપયોગ સુધ્ધા ન થયો.

૬) આ બધાનુ એક જ કારણ આપણને મળે છે તે છે સમયનો અભાવ. આવા ટાઇટ કાર્યક્રમમાં જામનગર મંડળના પ્રમુખને લાંબા સમય સુધી માઇક આપવાની જરૂર ન હતી અને તેમણે આપેલ સુચન પર react કરી ફાળો ઉઘરાવવાની જરૂર ન હતી. તેમણે કેટલી મિનિટ બોલવાનું છે તે તેમને અગાઉથી જણાવવું જોઇતુ હતુ. તેઓ આપણા મહેમાન હતા. તેઓ નહોતા આપણા જ્ઞાતિજન કે નહોતા Donor.

૭) આ સમયના અભાવને હિસાબે આપણા બાળકોનું સન્માન પણ વ્યવસ્થિત થયું નહી. જે કાર્યક્રમ અતિ મહોત્વનો હતો તેજ ગૌણ થઇ ગયો. આવુ દરેક વખતે થાય છે. હવે બાળકોને સ્ટેજ ઉપર બોલાવવાનું બંધ કરી જુદા કાઉન્ટર પરથી ઇનામ આપી દેવુ જોઇએ. જેથી તેઓ નિરાશ થતા તો અટકે .

૮) Response/Feedback ફોર્મની વહેચણી મંડપમાં એમ કહીને કરવામાં આવી કે જ્ઞાતિજનોએ ફોર્મ ભરીને પાછું આપવાનું છે. વળી આ ફોર્મ પણ ઇગ્લિશમાં છપાયુ. આ ફોર્મ છાપતી વખતે કોઇ કમિટિ મેમ્બરે એ ન વિચાર્યુ કે આપણામાંથી કેટલા આ ફોર્મ વાંચશે ? વાંચ્યા પછી કેટલા આનો જવાબ ઇગ્લિશમાં લખી શકશે ? વધુમાં તેમણે ફોર્મ પાછુ લેવાની તસ્દી સુધ્ધા ન લીધી.

૯) સવાલ-જવાબ અને ઇનામનો કાર્યક્રમ સુધ્ધા નિષ્ફળ નિવડ્યો. સવાલો આપણા સમાજ માટે ઘણા અઘરા હતા. મોટા સમુદાયને જવાબ આવડતા નહોતા આથી તેઓ નિરસ થઇ ગયા.

૧૦) સુવેનિયરમાં જાહેર થયેલા પારિતોષિક વિજેતાઓના નામો પણ ગુંચવાડાવાળા હતા. દા.ત. પાના નં. ૧૧૩ /૧૧૫ ઉપર ગુજરાતી માધ્યમ ૧થી ૯ ધોરણની નામાવલીમાં ૪થા કે ૭મા ધોરણના કોઇ પણ નામ નથી. તો પાના નં. ૧૧૫ ઉપર બીજી યાદિમાં ૧ થી ૯ ના બધા નામ છે. પરંતુ તે નામો આગલા નામો કરતા જુદા છે.તો વળી ૧૧૭માં પાને ત્રીજી યાદિમાં ૩ નામ જ છે. વિવરણ લખવામાં કદાચ કોઇ કચાસ રહી ગઇ હોય તેવુ લાગી રહ્યુ છે.

આમ હવે કમિટી મેમ્બરોએ ટાઇમ મેનેજમેન્ટ ઉપરાંત જોબ ડિસ્ટ્રીબ્યુશન પણ શિખવુ પડશે. ફરીથી આ ટીકા ભૂલો સુધારવા માટે છે. કોઇને નિચા પાડવા માટે નથી. આ સુવેનિયરમાં છપાયેલા સ્નાતકોના ફોટા અત્રે પબ્લિશ ધીરે ધીરે કરીશું જેથી તેનો ઉપયોગ કરવો સૌને સહેલો પડે.

Monday, February 22, 2010

યુવક મંડળના ૩૨મા વાર્ષિકોત્સવ (સુવર્ણ જયંતિ વર્ષ) નો આંખે દેખ્યો અહેવાલ

યુવક મંડળ સમાજના ૧૫૬૦ જ્ઞાતિજનોના કાફલાને ૨૫ બસ અને ૩૮ મોટરો મારફત લઇને
સવારના ૯ અને ૧૦ વચ્ચે ગ્રેટ એસ્કેપ રિસોર્ટ ખાતે પહોંચી ગયું હતુ. ઉમંગ, આનંદ અને ઉત્સાહના વાતાવરણ વચ્ચે જ્ઞાતિજનો એક બીજાનું અભિવાદન કરતા, મળતા હતા- ખબર અંતર પૂછતા હતા. રિસોર્ટ પર પહોંચતા જ જ્ઞાતિજનો માટે ચા-પાણી અને નાસ્તાની વ્યવસ્થા રાખવામા આવી હતી. ચા-કોફી ઉપરાંત નાસ્તામાં ગાંઠિયા - જલેબી, ઉપમા અને ઇડલી રાખવામાં આવેલ હતા.

નાસ્તો પતાવ્યા બાદ જ્ઞાતિજનો પોત પોતાના મિત્ર મંડળમાં ગોઠવાવા લાગ્યા. જેઓને નહાવા ધોવાની ઇચ્છા હતી તેઓ Rides તરફ વળ્યા અને જેઓને નહાવું-ધોવું નહોતું તેઓ ઝાડને છાંયડે બેસી પોત પોતાની રીતે અવસર અને સ્થળની મઝા લેવા લાગ્યા.

આ બધું ગોઠવાયું ત્યાં બાઈટીંગ નો રાઉન્ડ શરૂ થયો. બાઈટીંગમાં ઉતપ્પા, નુડલ્સ, મંચુરિયન, ફ્રાઇડ રાઇસ, કેળા /બટેટા વડા, રસમવડા વિ. નો આસ્વાદ લેવા જ્ઞાતિજનો લાગી ગયા. બીજી તરફ આપણા માટે ખાસ ઊભો કરવામાં આવેલ મંડપમાં ગેમ શો શરૂ થયો.જુદી જુદી જાતની રમતો દ્વારા હાજર રહેલા સભ્યોના દિલ બહેલાવવા ઇનામોની વહેંચણી પણ કરવામાં આવી. તો વળી યુવકમંડળના કાર્યકરો પારિતોષિક વિતરણ સમારોહ તથા વેબ સાઇટ ઉદ્ ઘાટન માટે તડામાર તૈયારીમાં લાગી ગયા.

આ બધું પતે તે પહેલા તો જમવા માટેની જાહેરાત થઇ ગઇ. શ્રીખંડ-પુરી, ૩ શાક, ઢોકળા,દાળ, ભાત, પાપડ, છાશનો જમણવાર તો હતો પરંતુ ઘણા જૂજ લોકો જમણવારને સંપૂર્ણ ન્યાય આપી શક્યા કારણ કે એક પછી એક પિરસાતી વાનગીઓમાં ૩૦૦ ગ્રામથી વધૂ ક્યાં કોઇ ખાઇ શકવાનું હતુ. ૧૨:૩૦ કલાકે ગોલા અને ડોશીના વાળની આઈટમ પણ શરૂ થઇ . બપોરના ધોમ ધખતા તડકામાં ગોલા માટે લાંબી લાઇનો પણ લાગી પણ દરેકને ગોલા લાંબા સમય સુધી મળતા રહ્યા.

બપોરના ૨ વાગ્યા પછી પારિતોષિક વિતરણનો કાર્યક્રમ શરૂ થયો. દિપ પ્રાગટ્ય, સ્ટેજ ઉપર બેઠેલા મહાનુભાવોના આવકાર અને અભિવાદન બાદ પ્રાસંગિક પ્રવચનો થયા. મંચસ્થ મહાનુભાવોએ તો દાનગંગા વહાવી યુવક મંડળને પૈસાથી તરબતર કરી દીધું. એક વસ્તુ એનાથી એ ફલિત થઇ કે હવે યુવક મંડળના સભ્યોએ પૈસા ભેગા કરવા કરતા તેને સરખી રીતે ગોઠવવા માટે , તેમાંથી સારી એવી ઉપજ કરી તે ઉપજનું શિસ્તબધ્ધ વિતરણ કરવા માટે કટિબધ્ધ થવું પડશે. તેના માટેની આવડત કેળવવી પડશે.

સુવર્ણજયંતિ વર્ષ નિમિત્તે જે દાન મળ્યુ તેની વિગત આ પ્રમાણે છે.

૧) શ્રી કાંતિભાઇ વજેશંકર વખારિઆ તરફથી : રૂ. ૧,૫૧,૦૦૦/- વેબ સાઇટના ૫ વર્ષના સ્પોન્સરર તરીકે
રૂ. ૧,૫૧,૦૦૦/- આ વાર્ષિકોત્સવના પ્રેરક દાતા તરીકે
રૂ. ૨,૦૦,૦૦૦/- સ્વ. વજેશંકર જગજીવન વખારિઆ પાઠ્યપુસ્તક ફંડમાં
રૂ. ૧,૭૧,૦૦૦/- ધાર્મિક સ્તોત્રમાં

૨) શ્રી વી. વી. શાહ તરફથી : રૂ. ૭૧,૦૦૦/- તેઓ સમારંભ પ્રમુખ થતા ખુશાલીના

૩) શ્રી ડો. અશોકભાઇ સંઘવી તરફથી : રૂ. ૩૧.૦૦૦/- તેઓ અતિથિ વિશેષ તરીકે પધારતા

૪) શ્રી રશ્મિકાંત જે. શાહ તરફથી : રૂ.૨૧,૦૦૦/- તેઓ સ્વાગત પ્રમુખ તરીકે પધારતા

૫) શ્રી ચંદ્રકાંત હીરાલાલ પટેલ તરફથી : રૂ. ૨૧,૦૦૦/- તેઓ સન્માન પ્રમુખ તરીકે પધારતા

૬) શ્રી કેતન નવલચંદ શાહ તરફથી : રૂ. ૨૧,૦૦૦/- તેઓને દિપ પ્રાગટ્યનો લાભ મળતા

૭) શ્રીમતિ ચંદનબેન કાંતિલાલ ટી. પારેખ તરફથી : રૂ. ૧,૭૧,૦૦૦/- વર્ધમાન તપની ૧૫થી વધૂ ઓળી કરનાર તપસ્વીઓના બહુમાન માટે

આ ઉપરાંત જામનગર વિશાશ્રીમાળી જૈન સમાજના પ્રમુખ શ્રી જગદિશભાઇ ઠક્કરના પ્રવચન દરમ્યાન ગંભીર બિમારી માટે ફંડ ભેગુ કરવા બાબત સૂચન કરાતા ૨૧ જ્ઞાતિજનો દરેકે રૂ.૫૦૦૦/-નું દાન જાહેર કરેલ. આમ રૂ. ૧,૦૫,૦૦૦ જમા થઇ ગયા.

આ સમારંભ દરમ્યાન જ જેઓનો આજ જન્મદિન હતો તેમને ભેટ આપવામાં આવી.

આ વખતની સ્મરણિકા જરા જુદી તરી આવે એવી બની છે કારણકે તેમાં ૨૦૦૮ અને ૨૦૦૯ માં ગ્રેજ્યુએટ કે ડબલ ગ્રેજ્યુએટ કે પ્રોફેશનલ ડિપ્લોમા થયેલ જ્ઞાતિજનોના સંતાનોના ફોટા છાપવામાં આવેલ છે. જે આડકતરી રીતે ઘણા બધા માટે સગપણ બેંકનું કામ કરશે. સુવર્ણ જયંતિ પ્રસંગે લક્કી ડ્રો માં ૧ ગ્રામ સોનાના સિક્કાઓ રાખવામાં આવેલ હતા. તેના ડ્રોની જાહેરાત પણ કાર્યક્રમ દરમ્યાન કરવામાં આવી. ૩ જ્ઞાતિજનોને સોનાની ૧ ગ્રામની લગડી ઇનામમાં મળી.

અરે! તમોને ખાણીપીણીમાં શું થઇ રહ્યુ છે તે કહેતા તો ભૂલી જ ગયા. ત્યાં તો ચા અને બાફેલા મગ અને ચણા મળી રહ્યા છે.

આ બાજુ પારિતોષિક વિતરણનું કામ ચાલું થયું. તે પુરૂ થતા સાંજના પાંઉ ભાજી, પુલાવ અને રાઇતુ જ્ઞાતિજનોની રાહ જોઇ રહ્યા હતા.તેને ન્યાય આપી જ્ઞાતિજનો પોતપોતાની બસો તરફ ઘર તરફ પ્રયાણ કરવા વળ્યા. ગેટ ઉપર તેમને આઇસક્રીમ આપી રવાના કરવામાં આવ્યા.

ખાવાપીવાની ચીજો ઘણી હોવા છતાં બપોરનું જમવાનુ મધ્યમ કક્ષાનું રહ્યુ. જ્યારે બીજી બધી વખતે ઠીક કહી શકાય તેવુ રહ્યુ.

આ થઇ પ્રસંગની ઉજળી બાજુની વાત. આવડા મોટા પ્રસંગમાં ગરબડ, ગોટાળા કે ઝગડા ન થાય તો જ નવાઇ. તેની વાત આવતી કાલે કરીશું. આજ આટલું બસ.

Monday, February 8, 2010

ગ્રેટ એસ્કેપ રીસોર્ટ પર જવા માટે જરૂરી

બસના આવવા તથા જવાના પાસ જો તમે રૂ. ૧૫૦ ભરીને રીસોર્ટમાં જવાના હો તો મેળવી લેજો. આ પાસ બે ભાગમાં વહેચાયેલો છે. એક ભાગ (ડાબો) જવા માટે તથા બીજો (જમણો) આવવા માટે જરૂરી છે.આ પાસ વગર બસમાં દાખલ થવા નહિ દેવાય. આખો દિવસ પાસ સાચવવો જરૂરી છે.

આમંત્રણ પત્રિકા-કમ- ટિકીટ નું પહેલું પત્તુ. ૫૦મા વર્ષે ૩૨મો વાર્ષિકોત્સવ થઇ રહ્યો છે. ૧૮ વર્ષ ક્યાં ગુમ થઇ ગયા તે એક સંશોધન નો વિષય છે.


પાના નં ૩ પર આપણા સમાજના page 3 ના મહાનુભાવો. જેમના નામ પણ હોવા જોઇએ પણ નથી તેઓ માફ કરે. નામ ઝીણવટથી વાંચવા માટે એટલે કે મોટા કરવા ફોટા ઉપર ક્લિક કરો અને ત્યાર બાદ Ctrl + /Ctrl- નો ઉપયોગ કરી સાઇઝ એડજસ્ટ કરો. રીસોર્ટનું સરનામુ આ પાના ઉપર છે.

રીસોર્ટમાં દાખલ થવા માટે જરૂરી એન્ટ્રી પાસ. બસનો પાસ હસે અને આ પાસ ભૂલી ગયા તો હિરો ઘોઘે જઇ આવ્યો અને ડેલીએ હાથ દઇ આવ્યો વાળી થશે. એન્ટ્રી પાસ ઉપર ટેલીફોન નં રીસોર્ટના હોય તેવું લાગે છે.


સાચા દિલથી કહેજો ઉપરની વાતમાં તમે સહમત છો ? તો પછી જૈન ધર્મની કર્મની ફિલોસોફીનું શું? આ પાનાની વિગત ઝીણવટથી વાંચવા માટે એટલે કે મોટા કરવા ફોટા ઉપર ક્લિક કરો અને ત્યાર બાદ Ctrl + /Ctrl- નો ઉપયોગ કરી સાઇઝ એડજસ્ટ કરો.